Árás þvottabjarna

Við lögðum af stað á föstudaginn í tjaldferðarlag í miðjum rauðviðarskógi við Santa Cruz. Við fórum í einu og öllu eftir leiðbeiningum Yahoo maps um hvernig við ættum að komast að þjóðgarðinum - eina vandamálið var að tölvan fann bara stystu leiðina að garðinum sem var að inngangi sem var hvergi nærri tjaldsvæðinu - eiginlega á bak við svona tvö fjöll og engir vegir lágu þar á milli. Ferðin í skóginn tók því 3,5 tíma en ekki 1,5. Skapið á mannskapnum batnaði þó heldur betur þegar við komum í skóginn þar sem við fengum tjaldstæði næstum út af fyrir okkur innan um risastór rauðviðartré. Við hentum upp tjaldi frá Erik og Bylgu - sem var stærra heldur en íbúðin okkar hérna í San Fran og byrjuðum að grilla. Um leið og Hjördís opnaði kjötpakkann kom þvottabjörn hlaupandi upp að okkur vildi fá bita. Kristinn Kári rak hann í burtu, en um leið kom annar og allir vildu þeir í grillið - þá sáum við skilti þar sem varað við ágengum þvottabjörnum sem geta opnað kælibox og tjöld til þess að ná sér í mat. KK var því gefið þvað verkefni að halda þvottabjörnunum frá matnum. Við reyndar rákumst líka á geitur, íkorna og páfugl - en þeir vildu ekkert hafa með matinn okkar að gera, enda grænmetisætur. Hitinn féll niður að frostmarki um nóttina, svo við útilágum í lopapeysum og með húfur eins og á Íslandi en ekki í stuttbuxum og bíkíníi eins og við höfðum fyrst gert ráð fyrir.

Á laugardeginu keyrðum við svo til Santa Cruz og fórum þar á ströndina. Náðum aðeins að vinna í taninu áður en allir gestirnir koma í júní - ekki hægt að koma heim hvítur eftir tvö ár í Kalifórníu. Við fengum okkur svo mótel rétt hjá ströndinni. Herbergið, sem var í raun þrjú herbergi, var líka stærra en íbúðin okkar (sem er reyndar ekkert mjög stór). Á sunnudeginum fórum við svo í skemmtigarð við ströndina, fórum í rússíbana. Í einu tækinu blotnuðum við og þá heyrðist í KK: ég kom sko ekki hingað til þess að blotna. Við gengum næst að stórum fallturni og þá heyrðist í honum aftur: ég kom sko ekki hingað til þess að meiða mig. Þegar við fórum í hryllingshúsið sagði hann samt ekki neitt - hélt bara fyrir augun og var hljóður sem aldrei fyrr. Við fórum svo heim - og í þetta skipti fundum við rétta leið. Eftir 3 tíma ferðalag til Santa Cruz var aðeins klukkutímakeyrsla heim vel þegin.

Athugasemdir

[guðbjörg Júlídóttir (IP-tala skráð) 12.5.2008 kl. 20:32]

Það hlaut að vera að þið væru á ferðalagi,  því mömmu gömlu var ekki svarað alla helgina. Voru þið búin að gleyma öllum skógarsögunum síðan í fyrra, þá voru það bara íkornarnir sem ætluðu að éta okkur. Kv mamma

[Brynhildur (IP-tala skráð) 13.5.2008 kl. 12:28]

Þetta hefur nú verið meira ferðalagi og þvílíka ævintýrið.  Hlakka til að sjá myndir úr þessari ferð hjá ykkur.  Og það er sko einsgott að þið hafið getað unnið soldið í taninu :-)

Hlakka til að fá ykkur heim. 

[Kristín Margrét (IP-tala skráð) 13.5.2008 kl. 21:36]

Þið eruð alltaf jafn dugleg að kanna Ameríkuna. Um að gera enda fer að líða að heimför. Það hefur verið stuð í skemmtigarðinum....humm skellti Dísin sér í rússíbana ? eða sat jafnvel bara á hliðalínunni, vinnandi í taninu og drekkandi mimosa ;)

knus og kram

Stína fína.

[Kolla (IP-tala skráð) 17.5.2008 kl. 15:24]

Þið ætlið aldeilis að ná að upplifa áður en þið farið heim ..... brjálað að gera í ævintýrunum. Vonandi hittumst við eitthvað á klakanum í sumar.